Luke 1

1Ekem huwo aria higier hirro innafa egiemini to hiji hohoi. 2Illafa egonyu to honyiehite te innohosie to hitieri hidofe ara ahegiamak illo hirro inno Hollum, isieja ifa elimak dohooi. 3Ara nololibo da hanaŋ ŋasiehini hirro daŋ to bisan to hitieri, hegiorohini do hoi nolobis, iye Tofillo lalanyar. 4Awak naŋ anyar liyien iye ibisiti inno hirro dede innafa etiyana huwo iyye.

5Do holoŋitek innafa he Erode, habu lo Yudeya, owuoun ifa lobo Fadiri lefurak Sakariya, ta ŋati ba Abija. Ara ifa noŋorwo honyie tere woyo na Arone, nafa ara fure nohonyie Elisabeta. 6Olibo ifa isieja daŋ do hosiere ho Hollum, olot obe hipali to hifahita daŋ iko to hirro inno Habu. 7Hati obe ifa isieja owuon he innak durre nyo oweita ifa Elisabeta, ojo hidofe ara marwahi binno.

8To nabo holoŋ nafa egiamari Sakariya higemita innohonyie inno Fadiri do hosiere ho Hollum to higiemi no ŋhati nohonyie, 9Ette Fadirihien ejufak imohit ette anyimu inyeja to hibiro moru hehutu ŋai hotojiŋak da Haji Imojit na Habu hotosuahak ettegoŋ. 10Nafa lera suaha no ettegoŋ, ette iluluŋ no huwo hamojok weita da bali.

11Ette anjillo la Habu ŋetilek kwan do honyie, oweita da hana iŋiet no altari no ettegoŋ. 12Nafa legonyu Sakariya anjillo lie, ette baŋi hinnef inyeja. 13Ette anjillo hijo do honyie, “Hebaŋ, Sakariya nyo etirini ifa mojo nohoi. Esik iso noŋorwo hoi Elisabeta iye hito lolewa, eijo iye ette efurek inyeja Yoani.

14Obolo iso hitihabwo ho munoi do hoi iko do iluluŋ no huwo lesiuni inyie. 15Ara iso inyeja lehitok do hosiere ha habu. Obe iso inyeja amatta fino, hifioŋ inno ajalaŋi kuya balu no logol. Many helesiuni inyeja efut iso inyie ho Loholio lo Olibo.

16Ehumak iso inyeja iluluŋ no durre ille Israile hotoyite ahalu da Habu Hollum. 17Olot iso inyeja to hosiere honyie to duaran iko to golon ojo Loyiri no Elija lo Hollum. Eloit iso inyeja tajia inno monyie do durre innohosie, eloit hidofe ha massiok heruhori higilita inno huwo illo lobis- Ehumak iso inyeja huwo da ŋawoŋ no Habu.”

18Ette hidofe Sakariya hifi anjillo lie hijo, “Hayen iso naŋ jai hijo ara hirro inne dede Nyo emaruak naŋ ojo hidofe noŋoruo hanaŋ emaruak nno.” 19Etiraŋ ifa anjillo inyeja hijo, “Naya Gabriele. Aweita naŋ do hosiere ho Hollum lelefahu naŋ helimahini iye sayye inne lanyard. 20To wolo, edua iso iye many do holoŋ nelebarari hirro hunna nyo ibe iye leruk hiro hanaŋ inne leriamik da far na lanyar. Ibe iso iye ero many afanini hirro inne hira dede lottubai holoŋ nohose.”

21Etila ifa huwo Sakariya, many elafuhori huwo hijo nyo leliŋa inyie fur do hotwai Haji Imojit Nahitok. 22Ifa laŋajiŋu inyeja abali, einyiei inyeja helero do hose; ette isieja agilu hijo aŋalew nobo sihinne do hotwai Haji Imojit inna Hitok. Obe ifa inyeja oremik hiro do hosie, da mai le ette inyeja hihuto do hosie hihuta ta has. 23Nafa lottubai holoŋitek innohonyie inne igem da haji holomojori, acahari Sakariya ahaŋ.

24Da halu nabo, ette noŋoruo honyie Elisabeta hibuŋuta einyiei helebusak Haji Imojit many yafajin miet. 25Ette Elisabeta hijo, “Ehum Habu da hanaŋ nalanyar,” “Do holoŋitek hunna etuhutek mune nohonyie de naŋ, ette ŋadumu irri inna nanaŋ ade ho huwo.”

26Iyane to hibuŋuta na Elisabeta yafajin ile, efahak ifa Hollum anjillo Gaburele abore gala Nasaret nyie da fau ho Galileya, 27do hoduoti nafa esaŋa tihoni lara fure Yosefu. Ara ifa inyeja to woyo ba Davide, ojio fure no hoduoti nyie ara Mariya. 28Ette hati anjillo ŋawoŋ do honyie ette hijo, “Togolo Maria; owuon Habu ho iye.” 29Etigiama ifa Maria binno to sayye inno anjillo, hijo hojo hirro inne honyie nyo.

30Eijoo anjillo do honyie hijo, “Maria, baŋa labaŋ, owuon Hollum ho a grasia dohoi. 31Towolo, ebuŋuta iso iye ette iyye esiu hito lolewa, eijo iye ette efurek inyeja Yesu. 32Obolo iso inyeja ette hililloŋo inyeja hito lehitok lo Hide. Habu Hollum iso leiso inyeja hara no Monye Honyie, Davide. 33To nia, ottu iso inyeja hira a Habu woyo no Yakobo tulaŋ obiaŋari hisidi no lobie nohonyie.”

34Ette Mariya elimak do anjillo lie hijo, “Holobe naya aŋatirohini ho lobo oliawa, hafanu iso hirro jai?” 35Etiraŋ ifa anjillo inyeja hijo, “Ottu iso Loholio lo Olibo dohoi, ottu iso duaran no Hollum emuluhak iye. Ette iso iye hililloŋo hito le lo Lolibo Lenyi Hollum.

36Towolo Elisabeta, ne ta haŋ, eholofi ifa hido inyeja. Hati iyane owuana ho hosehe no yafajin ile, emaruak ida hido inyeja binno. 37Obe hidonyi nabo sihinne ne leriamik himir Hollum.” 38Ette Mariya hijoo, “Dede, ara naya hegiamani no Hollum, isiara hati hebara da hanaŋ iya lojo hiro nohoi. Ette hati anjillo ŋebusak inyeja.

39Do holoŋitek nuha odiote Mariya ette ŋarruhari adoŋe no Yudeya, 40eno inyeja ahotwai haji ho Sakariya ette hifony Elisabeta. 41Nafa etiru Elisabeta hifonya na Mariya, ette lodole lie to hosehe diote; hati efut ifa Elisabeta ho Loholio Lolibo.

42Ette inyeja hiro woŋwoŋ hijo, “De hiji ho ŋoruo daŋ obolo munoi dohoi ho hito le ittu iye esiu! 43Nyo lottu hotonye Habu ariŋari naŋ? 44Ta nara etiruni naya hifonya nohoi, ette hito to hosehe hanaŋ hididiaŋa to munoi. 45Hotowuana munoi ho jaha dohoi heruhoni aŋawoŋ sayye dede innafa efahu Hollum.”

46Ette Mariya hijo, “Etihabuo taji hanaŋ Monye, 47Etimuno Hollum Loyiri hanaŋ, nyo inyeja lara hetilahani.

48Nyo egonyu inyeja fiahajo hanaŋ hegiamani. Iyane many ahosiere elilloŋo iso hilahajik daŋ naŋ ahamunoni, 49Egiem Lehitok da hanaŋ hirro aria inno hittaha; ojo fure nohonyie Olibo.

50Ara hamehini Nohonyie de hilahaji many de hilahaji illo huwo illa labaŋ inyeja. 51Egiem inyeja hirro inno logol ta has innohonyie; etisarik inyeja luha ille etidara da tajia innohose.

52Epihe inyeja henefitak to harajin afau, ette hihaf ahide illo lowuon da fau. 53Eiso inyeja hirro inna lanyard do huwo illo lowuon ho hiŋa, ette efuhai adde huwo habarak asai.

54Ette inyeja hiluak hegiamani Lohonyie Israile, anyar lowuon ho hamehini 55Da Abramo iko woyojin illohonyie tulaŋ, iya nafa letterok inyeja do hohonyieok hijo ehum iso inyie.”

56Amanya ifa Mariya he Elisabeta iya yafajin hunik, ette acahari ahaji honyie. 57Ifa lara holoŋ ne hitado no Elisabeta lodole, esiu inyeja lenyi. 58Etiru Lenyihari ho hilahaŋ honyie hijo ammehini Habu inyeja ette isieja munoi ho inyie.

59Niya, te hitatohunihi no holoŋ, aŋafanu isieja higot hito lodole; ette isieja wahan efurek inyeja hetera Sakariya, fure no money honyie. 60Ette hati hotonye honyie hitiraŋ hijo, “Obe, elilloŋo iso inyeja hijo Yoani.” 61Ette isieja hijo do honyie, “Obe lobo de hiji ho woyo hatai le efurek huwo fure ne.”

62Ette isieja ŋelimak money hotorrumu nari fure lawak inyeja ŋefurek. 63Ette inyeja hifia nobo higieri hegiorohini to hide honyie. “Fure nohonyie lara Yoani.“Ojo isieja daŋ ette hililiha binno.

64Kokuak ette hutuk nohonyie ŋa ojo hidofe ŋadief ebusahini, ette inyeja hitiara hiro hitahuo Hollum. 65Ette baŋi ŋawoŋ do huwo daŋ illafa amanya, elur isieja ho hirro daŋ innafa leduoŋ erarari daŋ da massiok ho fau inno Yudeya. 66Huwo illafa daŋ etiru odule higigillo hijo nyo hafa leduoŋ ette hijo, “Hottu iso lodole hira anyo?” Ette isieja ŋaheru hijo owuon hafa hana na Habu ho inyie.

67Efut ifa money honyie Sakariya ho Loholio Lolibo, ette inyeja hiro hikili inna, 68“Hetahue Habu Hollum le Israile, nyo aŋawoŋ inyeja dohooi ette ŋehumak ikoi no hahehini huwo hotowuana ania.

69Eiso inyeja dohooi hetillohini lologol tere woyo ba haigemani honyie Davide, 70Iya ero Hollum tok hekilak illohonyie ifa beren. 71Aŋaterok inyeja hesiarari dohooi ŋetillohini tere merok illohooi, ho tere hana ho luha oliwari kwaite illohooi.

72Egiem inyeja inna hetihutahini hamehini no hohonyieok hohooi, ho hagiluni himora no lolibo. 73Himora nya ara aŋettenyahini na has nafa ero inyeja da Abramo hohonyie hohooi. 74Aŋehumak inyeja ŋettenyak na has anyar lohek iyohooi asai to has inno merok illohooi ho hebusahini iyohooi hegiamari do honyie obe baŋi, 75To libe iko to bisan do hosiere honyie do holoŋitek innohooi daŋ.

76Hidonyi iye Lenyi hanaŋ, elilloŋo iso iye ahekilani lo lia to hitidara nalagalik anyar lehu iso iye do hosiere ho Habu hediarak huwo da ŋawoŋ nohoye, 77Anyar hidofe elwak huwo hotoyen hijo etillohini iso isieja jai to habisani no hiyatta.

78Hollum lohoi iso obusak iyohooi to hamehini nohonyie, da hamehini inna, hetilahani ille ara iya holoŋ no moite iso lolotu te ido haluahari iyohooi. 79Opipiak iso do huwo illo ettole te idumele iko lohidis no ye; eriria iso inya hejek innohoi to hikoi no himora.”

Tonya ette hito bolo ette ŋawoŋ golon do loholio. Amanya inyeja allet de icala no lotte etiarari inyeja ŋalew de hiji ho huwo illo Israile.

80